வாசமலர்ச் செடிகளிலே தேனைத் தேடும்
வண்டுகளின் ரீங்காரம் மரங்கள் மீது
ஓசையெழப் பறவையினம் பேசும் பேச்சும்
ஓடைகளின் சலசலப்பும் தென்ற லாக
வீசுகின்ற மென்காற்றில் வயலின் கதிர்கள்
விளைக்கின்ற அலையாட்டம் மகிழ்வின் எல்லை
பேசுதற்கு இயலாத பசுமை கொள்ளும்
பரவசத்தின் அடையாளம் பார்த்து ளோமே.
முகநூல் அமெரிக்கா முத்தமிழ் இலக்கியப் பேரவை
8 வரி - எண்சீர்க் கழிநெடிலடி ஆசிரிய விருத்தம். 14.3.2025
கொஞ்சம் பொருளீட்டிக் கொண்டுவர வக்கில்லை
அஞ்சுவகை கேட்கவாய் அஞ்சாதோ ---- எஞ்சியதாய்
நின்றதற்கு நீரூற்றி நேற்றுவைத்த சோறுளது
இன்றைக்குப் போதும் இது
ஈற்றடிக்கு எழுதி, அமுதசுரபி ஜூலை 2024 இதழ் வெண்பாப் போட்டியில் இரண்டாம் பரிசு பெற்றது.
(ஆழ்வார் வாய்ச்சொல் -- நம்மாழ்வார் திருவாய்மொழி)
ஈற்றடிக்கு எழுதி, அமுதசுரபி ஜூன் 2024 இதழ் வெண்பாப் போட்டியில் முதற் பரிசு பெற்றது.
வெள்ளைக் கமலத்துன் வீற்றிருப் பென்நெஞ்சைக்
கொள்ளைதான் கொண்டதெனக் கூறுவனோ --- மெள்ளநீ
கள்ளங் களைந்தெனது கல்நெஞ்சே கோயிலாய்
உள்ளிருக்க வந்தாய் உவந்து.
சன்னல் வழியிறங்கிச் சேற்றில் குதித்தகணம்
மண்ணில் மறுபிறவி மாளாதே --- எண்ணிலதே
பாலத்தைப் போயிடித்த பேருந்தில் வீற்றிருந்து
காலத்தை வென்ற கணம்.
ஈற்றடிக்கு எழுதியது அமுதசுரபி ஏப்ரல் 2024 இதழில் வெளியானது
விண்ணியல் வேதியல் முதலா யுள்ள
எண்ணிலா வகையுள துறைக ளூடே
பெண்ணிலா தொன்றிலை பெருமை மிக்கோர்
நுண்ணறி வுடையராய் நூல்கள் கற்று
மண்ணில் உழைப்பினில் ஒளிரு கின்றார்.
பெண்மையே உலகிதில் அன்பின் தோற்ற
பெண்மையே உயிர்களின் ஜீவ ஊற்று.
பெண்மையாய் விளங்குமோர் சக்தி தெய்வம்.
இன்றவர்க் கினுமுள இன்னல் மாற்றி
பெண்நிலை உயர்த்திப் பெருமை கொள்வமே.
கவிஞர்கள் கலைக்கூடம் முகநூல் பதிவு. 8.3.2025 ஒழுகிசை அகவலோசை உடைய நிலைமண்டில ஆசிரியப்பா. மகளிர் தினம்.
அல்லவை தேய்ந்தே அறம்பெருக
இம்மண்ணில்
நல்லவையே எண்ணட்டும் நம்சிந்தை --- வல்லவைதான்
நல்லதே செய்யட்டும் நம்கரங்கள் என்றென்றும்
நல்லதே பேசட்டும் நாக்கு.
அமுதசுரபி மார்ச் 2024
இதழில் மூன்றாம் நிலையில் தேர்வாகி வெளியானது.
கல்லான நெஞ்சைக்
கனிவித்துத் தானுறையும்
இல்லாகக்
கொண்டாள் இசைவாணி --- கல்லாத
என்னைக் கவிஞனென
ஏற்றம் பெறவைத்த
அன்னை பதமே
சரண்.
