பெண்நிலை உயர்த்திப் பெருமை கொள்வோம்

விண்ணியல் வேதியல் முதலா யுள்ள

எண்ணிலா வகையுள துறைக ளூடே

பெண்ணிலா தொன்றிலை பெருமை மிக்கோர்

நுண்ணறி வுடையராய் நூல்கள் கற்று

மண்ணில் உழைப்பினில் ஒளிரு கின்றார்.

பெண்மையே உலகிதில் அன்பின் தோற்ற

பெண்மையே உயிர்களின் ஜீவ ஊற்று.

பெண்மையாய் விளங்குமோர் சக்தி தெய்வம்.

இன்றவர்க் கினுமுள இன்னல் மாற்றி

பெண்நிலை உயர்த்திப் பெருமை கொள்வமே.

கவிஞர்கள் கலைக்கூடம் முகநூல் பதிவு. 8.3.2025 ஒழுகிசை அகவலோசை உடைய நிலைமண்டில ஆசிரியப்பா. மகளிர் தினம்.

ப.கே. 78. நல்லதே பேசட்டும் நாக்கு

 

 அல்லவை தேய்ந்தே அறம்பெருக இம்மண்ணில்

நல்லவையே எண்ணட்டும் நம்சிந்தை --- வல்லவைதான்

நல்லதே செய்யட்டும் நம்கரங்கள் என்றென்றும்

நல்லதே பேசட்டும் நாக்கு.

 

அமுதசுரபி மார்ச் 2024 இதழில் மூன்றாம் நிலையில் தேர்வாகி வெளியானது.